konnivartha.com: മൈലപ്ര വള്ളിക്കോട് പഞ്ചായത്തുകളെ കോന്നി താലൂക്കിലേക്ക് ചേർത്ത് നടപടി റദ്ദാക്കി കൊണ്ടാണ് സംസ്ഥാന സർക്കാർ വിജ്ഞാപനം പുറപ്പെടുവിച്ചത്. രണ്ടു പഞ്ചായത്തുകളിലെയും ജനങ്ങൾ അനുഭവിക്കുന്ന ദുരിതം കോന്നി എംഎൽഎയുടെ ശ്രദ്ധയിൽപ്പെടുത്തിയതിനെ തുടർന്നാണ് കൃത്യമായ പരാതിയും തുടർനടപടികളും ഉറപ്പാക്കിക്കൊണ്ട് ഒടുവിൽ ജനങ്ങളുടെ ആഗ്രഹത്തിന് അനുസരിച്ചുള്ള തീരുമാനം സർക്കാരിനെ കൊണ്ട് എടുപ്പിക്കാൻ സാധിച്ചത്.
കോന്നിയിലെ മുൻ ജനപ്രതിനിധി അധികാര ദുർവിനിയോഗവും ധാർഷ്ട്യവും പ്രകടിപ്പിച്ച് അശാസ്ത്രീയമായി കോന്നി താലൂക്കിലേക്ക് ചേർക്കപ്പെട്ട രണ്ടു പഞ്ചായത്തുകളെ തിരികെ കോഴഞ്ചേരി താലൂക്കിലേക്ക് ചേർത്തുകൊണ്ടാണ് എൽഡിഎഫ് സർക്കാർ ഉത്തരവ് ഇറക്കിയത്. ഭൂമിശാസ്ത്രപരമായി കോഴഞ്ചേരി താലൂക്കിന്റെ തൊട്ടടുത്ത് കിടക്കുന്ന മൈലപ്ര വള്ളിക്കോട് പഞ്ചായത്തുകളായിരുന്നു കോന്നി താലൂക്കിലേക്ക് കൂട്ടിച്ചേർത്തത്.ഇതിനെതിരെ ശക്തമായ ജനകീയ സമരം ഉയർന്നുവന്നിട്ടും നടപടി സ്വീകരിച്ചിരുന്നില്ല.കോന്നിയിലെ മുൻ ജനപ്രതിനിധി ജനകീയ സമരങ്ങളോട് മുഖം തിരിഞ്ഞു നിന്നാണ് അശാസ്ത്രീയ കൂട്ടിച്ചേർക്കൽ നടപ്പാക്കിയത്.
2019ൽ ഉപതിരഞ്ഞെടുപ്പ് സമയത്താണ് ജനങ്ങൾ ഈ വിഷയം പരാതിയായി നിലവിലെ എംഎൽഎ ജനീഷ് കുമാറിന്റെ ശ്രദ്ധയിൽപ്പെടുത്തിയത്. ഇതോടെ ജനങ്ങളുടെ പ്രശ്നത്തിന് അടിയന്തര പരിഹാരം ഉണ്ടാകുമെന്ന് സ്ഥാനാർത്ഥിയായിരുന്ന ജനീഷ് കുമാർ അന്ന് ഉറപ്പു നൽകിയിരുന്നു.ഇതിൻറെ അടിസ്ഥാനത്തിൽ വിജയിച്ചശേഷം തുടർനടപടികൾ ആരംഭിച്ചിരുന്നു.ബഹുമാനപ്പെട്ട മുഖ്യമന്ത്രിയോട് ജനങ്ങളുടെ ഈ വിഷയം ശ്രദ്ധയിൽപ്പെടുത്തുകയും അദ്ദേഹം ജനങ്ങളുടെ പരാതിയിൽ നടപടി സ്വീകരിക്കാൻ റവന്യൂ വകുപ്പിന് നിർദ്ദേശം നൽകുകയും ആയിരുന്നു. ഇതിനെത്തുടർന്ന് അന്നത്തെ റവന്യൂ വകുപ്പ് മന്ത്രിയുമായി ഉദ്യോഗസ്ഥരുമായും നിരവധി തവണയാണ് പ്രശ്നപരിഹാരത്തിന് ചർച്ചകളും ഇടപെടലുകളും നടത്തിയത്.എന്നാൽ ഒരിക്കലും ശരിയാകരുത് എന്ന് കരുതി വലിയ കുരുക്കായിരുന്നു അന്നത്തെ സർക്കാർ ഉത്തരവിൽ എഴുതിച്ചേർക്കപ്പെട്ടത്.ഇതിലെ സാങ്കേതികത്വം നിറഞ്ഞ നൂലാമാലകൾ ഇല്ലാതാക്കാൻ നിലവിലെ റവന്യൂ മന്ത്രിയും വലിയ സഹായമാണ് നൽകിയത്.തുടർച്ചയായ ദിവസങ്ങളിൽ റവന്യൂ വകുപ്പ് മന്ത്രിയുമായും ഉന്നത ഉദ്യോഗസ്ഥരും മീറ്റിങ്ങുകൾ നടത്തിയാണ് ഈ നൂലാമാലകൾ പരിഹരിച്ചത്.പഞ്ചായത്തുകളെ കോന്നി താലൂക്കിലേക്ക് കൂട്ടിച്ചേർത്ത ഉത്തരവ് റദ്ദാക്കണ്ടതിന്റെ ആവശ്യകത മന്ത്രിയെ ഉൾപ്പെടെ ബോധ്യപ്പെടുത്തുകയും ചെയ്തു.തുടർച്ചയായി നടത്തിയ ഇടപെടലുകൾ ഒടുവിലാണ് ജനങ്ങളുടെ ആവശ്യം സർക്കാർ അംഗീകരിച്ചത്.13 വാർഡുകൾ ഉള്ള മൈലപ്ര പഞ്ചായത്തിലെയും 15 വാർഡുകൾ ഉള്ള വള്ളിക്കോട് പഞ്ചായത്തിലെയും ജനങ്ങളുടെ ഒരു ദശാബ്ദം നീണ്ടുനിന്ന ആവശ്യങ്ങൾക്കാണ് ഇതോടെ അംഗീകാരം ആയത്.
മുഖ്യമന്ത്രി, റവന്യൂ വകുപ്പ് മന്ത്രി, ഓരോ സാങ്കേതിക പ്രശ്നങ്ങളെയും കൂടെ നിന്ന് പരിഹരിച്ച ഒരു പിടി ഉദ്യോഗസ്ഥർ എന്നിവരെല്ലാം ഈ ശ്രമത്തെ ആത്മാർത്ഥമായി പിന്തുണച്ചതായും കെ യു ജനീഷ് കുമാർ എംഎൽഎ പറഞ്ഞു.ജനങ്ങളുടെ പ്രായോഗിക ബുദ്ധിമുട്ടുകൾ മനസ്സിലാക്കാതെ അധികാര ദുർവിനിയോഗം നടത്തിയായിരുന്നു അന്ന് പഞ്ചായത്തുകളെ കോന്നിയിലേക്ക് കൂട്ടിച്ചേർത്തത്.ജനങ്ങളുടെ ബുദ്ധിമുട്ട് മനസ്സിലാക്കി എംഎൽഎ നടത്തിയ ഇടപെടലുകളാണ് ഒടുവിൽ സംസ്ഥാന സർക്കാർ അംഗീകരിച്ചത്.ഇതോടെ ജനകീയ പ്രശ്നങ്ങളിൽ എൽഡിഎഫ് സർക്കാർ ജനങ്ങളുടെ ഭാഗത്തുനിന്ന് നടത്തുന്ന മറ്റൊരു പ്രവർത്തനം കൂടിയാണ് പൂർത്തിയായത്.
ജനങ്ങളാണ് പരമാധികാരി എന്നും അധികാരം ലഭിച്ചശേഷം ജനങ്ങളെ മറന്നു നടത്തുന്ന ഒരു പ്രവർത്തനത്തെയും ജനം അംഗീകരിക്കില്ല എന്നും കോന്നി എംഎൽഎ അഡ്വ. കെ. യു.ജനീഷ് കുമാർ വാർത്താ സമ്മേളനത്തിൽ വ്യക്തമാക്കി.വാർത്താ സമ്മേളനത്തിൽ എംഎൽഎ യോടൊപ്പം മൈലപ്ര പഞ്ചായത്ത് പ്രസിഡൻറ് രജനി ജോസഫ് വള്ളിക്കോട് പഞ്ചായത്ത് പ്രസിഡണ്ട് ആർ മോഹനൻ നായർ എന്നിവരും പങ്കെടുത്തിരുന്നു
